5 креативни идеи за уредување на мал двор

Со оригиналните идеи и ефектни градинарски елементи, дури и најмалото парче зелена површина може да стане оаза за уживање на која ќе и се воодушевувате.

Пергола како модерен елемент во дворот

Доколку просторот во Вашиот двор е мал за големо дрво или ви е потребна алтернатива додека тоа не порасне, перголата е елегантно решение кое ќе ви обезбеди ладовина и ќе и донесе на вашата градина повеќе карактер отколку чадор. Перголата на некој начин претставува продолжение на ентериерот бидејќи ќе ви овозможи простор во кој ќе се чувствувате како во дневна соба.

Креирајте смирувачка водена оаза

За да имате водена оаза во дворот, не е важно со колку простор располагате. Доволно е и сосема мало езерце или фонтана за да ве освежат и релаксираат за време на топлите денови. Ако сте миленик на „направи сам“ проектите кои не бараат многу време и пати, а можат во потполност да го променат просторот, пребарајте на Интернет, постојат илјадници совети за како тоа да го направите.

Ако не се плашите од амбициозни проекти и подготвени сте да издвоите малку повеќе пари за своето катче за релаксација на отворено, ви предлагаме во едниот дел од дворот да изградите воден ѕид кој секако нема да помине незабележано.

Песок како евтино и практично решение

Ако барате евтино и брзо решение и при тоа сакате максимално да го искористите својот простор, делот од тревникот заменете го со песок. Песокот е одлично решение бидејќи не бара посебно одржување, а и полесно се поставува од камените плочи или цигли. Единствено неопходно е да поставите подлога под песокот која ќе спречи растење на дива трева.

Украсни патеки

Интересната патека може да претставува вистински украс во градината, а некои од најдекоративните патеки се направени од разнобојни камења кои даваат вистинска слобода да ја изразите својата креативност. И сосема мала патека од капијата до куќата би била доволна да ги воодушевите своите гости, но и секој кој ќе помине покрај вашиот двор.

Вертикална градина

Вертикалната градина е исклучително атрактивна и лесно се вклопува во секој тип на двор, но и е идеално решение доколку немате многу простор на располагање. Со помош на нив можете да ја зголемите површината под растенијата во градината. Дополнителна предност е тоа што креативните вертикални градини можат да ги направите сами користејќи најразлични предмети како гајби, палети и стари шишиња.